တစ်နေ့
ငါတို့တွေ ပိုက်ဆံရှိလာတဲ့တစ်နေ့ သောက်ခဲ့တဲ့ မိုးခါးရေတွေ လက်ထိုးအန်မယ်။ ငါတို့တွေပိုက်ဆံရှိလာတဲ့တစ်နေ့ စကားထဲမှာ ပိုက်ဆံဆိုတဲ့အကြောင်းထည့်မပြောကြေး။ ငါတို့တွေပိုက်ဆံရှိလာတဲ့တစ်နေ့ ကဗျာရေးတာဘာရသလဲဆိုသူတွေကို ပိုက်ဆံပေါ်မှာ ကဗျာတွေရေးပြီး ဝေပေးကြမယ်။ ငါတို့တွေ ပိုက်ဆံရှိလာတဲ့တစ်နေ့ ငါမမြင်ဖူးတဲ့ သစ္စာတရားဆိုတဲ့ဟာကြီးကို လိုက်ရှာဝယ်ကြမယ်။ ငါတို့တွေ ပိုက်ဆံရှိလာတဲ့တစ်နေ့ နှလုံးသားမရှိတော့သူများသမဂ္ဂဖွဲ့ကြမယ်။ ငါတို့တွေ ပိုက်ဆံရှိလာတဲ့တစ်နေ့ ကြေးစားလူသတ်သမားတွေငှားပြီး ကြာကူလီကောင်တွေကို သုတ်သင်ကြမယ်။ ငါတို့တွေ ပိုက်ဆံရှိလာတဲ့တစ်နေ့ ချစ်ခြင်းမေတ္တာစစ်စစ်ကတစ်ဖက်၊ ရာထူးတွေဂုဏ်တွေကတစ်ဖက် ထည့်ချိန်လို့ရတဲ့ ချိန်ခွင်ကြီးတစ်ခု အော်ဒါမှာရမယ်။ ငါတို့တွေ ပိုက်ဆံရှိလာတဲ့တစ်နေ့ စာအုပ်တွေကို ချေမွအခြောက်လှမ်း ဆေးလိပ်အကြမ်းတွေထဲ ထည့်သောက်ကြမယ်။ ငါတို့တွေ ပိုက်ဆံရှိလာတဲ့တစ်နေ့ ရုပ်ရှင်တွေကို နည်းနည်းချင်း ဖဲ့ အစိမ်းလိုက် မျိုချကြမယ်။ ငါတို့တွေ ပိုက်ဆံရှိလာတဲ့တစ်နေ့ ပန်းချီကားတွေကို အရည်ဖျော်ပြီး အကြောထဲထိုးထည့်ကြမယ်။ ငါတို့တွေ ပိုက်ဆံရှိလာတဲ့တစ်နေ့ သီချင်းတွေကို ခဲပြားပေါ်တင် မီးရှို့ပြီး ရှိုက်သွင်းကြမယ်။ ငါတို့တွေ ပိုက်ဆံရှိလာတဲ့တစ်နေ့ ကဗျာတွေကို အမှုန့်ကြိတ် ငါတို့နားထင်တွေကို ဓားနဲ့မွှန်းပြီး သိပ်ကြမယ်။ ငါတို့တွေ ပိုက်ဆံရှိလာတဲ့တစ်နေ့ Promise ဆိုတဲ့နာမည်နဲ့ တန်ဖိုးနည်း Handset တွေ ထုတ်ကြမယ်။ သူ့ရဲ့ အားသာချက်က ဖုန်းဘေလ်အားလုံးဟာ ငါတို့ပိုက်ဆံတွေထဲက ဖြတ်သွားလိမ့်မယ်။ အားနည်းချက်ကတော့ Ringtone သုံးခုပဲပါမယ်၊ ထပ်ထည့်လို့မရဘူး။ "အရမ်းချစ်တာပဲ"၊"တစ်သက်လုံးအတူတူနေမယ်"၊"ဘယ်တော့မှမခွဲဘူးနော်"။ ငါတို့တွေ ပိုက်ဆံရှိလာတဲ့တစ်နေ့ - အချစ်ကို ငွေကြေးကြောင့် မစွန့်လွှတ်မိပါစေနှင့် - ဆိုတဲ့ ဆိုင်းဘုတ်တွေ လိုက်ထောင်မယ်။ ငါတို့တွေ ပိုက်ဆံရှိလာတဲ့တစ်နေ့ သိပ်ချစ်ကြတဲ့စုံတွဲတွေကို ထောက်ပံ့ကူညီပေးဖို့ ရုံးခန်းတွေအများကြီးဖွင့်ရမယ်။ ငါတို့တွေ ပိုက်ဆံရှိလာတဲ့တစ်နေ့ ရုပ်သံလိုင်းတွေတည်ထောင်ပြီး ငွေကြေးရဲ့ဒုက္ခပေးပုံတွေကို ဝါဒဖြန့်ကြမယ်။ ငါတို့တွေ ပိုက်ဆံရှိလာတဲ့တစ်နေ့ နွားတွေမျက်လုံးမှာတပ်ထားတဲ့ မျက်မှန်စိမ်းတွေ လိုက်ချွတ်ပေးကြမယ်။ ငါတို့တွေပိုက်ဆံရှိလာတဲ့တစ်နေ့ ဘယ်သူသေသေ မာနေဦးမယ်ဆိုတဲ့ ငတေတွေကို ပျော့သွားအောင်လုပ်ကြမယ်။ ငါတို့တွေ ပိုက်ဆံရှိလာတဲ့တစ်နေ့ မျက်ခုံးထူထူနက်နက်နဲ့ ကောင်မလေးတွေကို လိုက်ငေးကြမယ်။ ငါတို့တွေ ပိုက်ဆံရှိလာတဲ့တစ်နေ့ ကတိတစ်ခုကို ဒေါ်လာတစ်သန်းနဲ့ တင်ဒါခေါ်ကြမယ်။ ငါတို့တွေ ပိုက်ဆံရှိလာတဲ့တစ်နေ့ ငါတို့ပိုက်ဆံတွေရှိလာကြလိမ့်မယ်။ ငါတို့တွေ ပိုက်ဆံရှိလာတဲ့တစ်နေ့အတွက် ငါတို့လည်း မဖြစ်မနေ ရှိနေကြရဦးမယ်လေ။
ဟိန်း
