Thursday, January 24, 2013
တထိတ်ထိတ် ◄ကိုရွေး► (ရွှေဘိုမြို့၊ပန်းကဗျာအဖွဲ့မှ ပေးအပ်သော ၂၀၁၂၊ ပန်းကဗျာခေတ်ပေါ်ကဗျာဆုရ)
မြက်ဖျားက နှင်းသီးလေး ကြွေကြသွားတဲ့အခါ
မြက်ပင်လေးဟာ အလံတိုင်လေးလို ထောင်မတ်လာမယ်ဆိုတာ သိပေမယ့်
ကျွန်တော့်မှာ ရင်ထဲ တထိတ်ထိတ်
မစားဘူးဆိုတဲ့အစားကို ဘယ်တော့မှမစားသူက
မသွားဘူးဆိုတဲ့ လမ်းကို ခြေလှမ်းလိုက်တော့
ကျွန်တော့်မှာ ရင် တထိတ်ထိတ်
ပွင့်ချိန်တန်ပွင့်မယ်ဆိုတဲ့ ယန္တရားအောက်မှာ
ပွင့်ချိန်လွန် ဖူးငုံလေးအတွက်
ကျွန်တော့်မှာ ရင် တထိတ်ထိတ်
ဇွန်ပန်းရုံအနီး နွံထဲကျွံနေတဲ့လှည်းဟာ
ငါတို့ကျီထဲက စပါးတွေကို သယ်ဖို့လာတာများလား ၀ိုင်းကူတွန်းရင်း
ကျွန်တော့်မှာ ရင် တထိတ်ထိတ်
ကိုယ်စိတ်နှစ်ပါး မျိုသိပ်ထားရတဲ့ သူ့မျက်နှာမှာ
လမင်းသာနေသလား ကြယ်တွေဝေနေသလား
မိုးတိမ်ပိနေသလား စိုးရိမ်မိတာလည်း
ကျွန်တော့်မှာ ရင် တထိတ်ထိတ်
အများအတွက်တော့ အားတက်စရာပါ
သူ့ပြည်သူအတွက် အသက် ဘ၀ နှလုံးသား
အကြိမ်ကြိမ် စတေးထားသူက
အမုန်းဓားကို နှလုံးသားနဲ့ထောက်ပြီး ကွေးနေရတာဆိုတော့
အမုန်းဓားကို နှလုံးသားနဲ့ထောက်ပြီး ကွေးနေရတာဆိုတော့
ကျွန်တော့်မှာ ရင် တထိတ်ထိတ် ။ ။
ကိုရွေး
ရနံ့သစ် မဂ္ဂဇင်း
ဖေဖေါ်ဝါရီလ ၊ ၂၀၁၂ - ခုနှစ် ။
Subscribe to:
Post Comments (Atom)
No comments:
Post a Comment