တစ်
တစ်နေ့သ၌ ကျွန်ုပ်ဂျက်ကွမ်းခြံကုန်းသည် တေးဂီတဧည့်ခံပွဲတစ်ခုအတွင်းသို့ ရောက်ရှိ၍ နေခိုက်ဖြစ်ပါ၏ ။ Announcer ခေါ် အစီအစဉ်ကြေညာသူက ကြေညာလိုက်၊ အဆိုတော်တစ်ဦး ဆင်းသွားသော် အဆိုတော် တစ်ဦးတက်လာလိုက်နှင့် မီးပွင့်ရောင်စုံ ပြိုးပြိုးပြက်ပြက်များကြား၌ ရောက်ရှိ၍ နေခဲ့ရာ ကျွန်ုပ်မှာ မှန်းဆ၍သာ နားသောတဆင်နေခဲ့ရသော်လည်း အနောင်ဇာ (Announcer ) ၏ ကြေညာချက်တို့ကို ဘဇာဟူ၍ တိတိကျကျမသိနိုင်ခဲ့ပါလေ။ မြန်မာစကားမှ ဟုတ်ပါလေစဟု ထင်ရလောက်အောင်ကို အပြောစွမ်းရည် မြင့်မားကြသော ခေတ်၏ သမီးပျိုကလေးတို့ ဖြစ်ကြပါကုန်၏ ။
'' ဂုဒဂါ ... ဇက်လက်ပြီ ရာဇွင်မျာရယ် ဒို့သမှီး သချင်နဲ့ တင်ဆက်မှာဘာ ... နာဆင်ဂျဘာရှင် ကျေဇူ ''
အနို့ကလိုသော ကြေညာချက်ကို တောနားရွက်ကြီးဖြစ်သည့် ကျွန်ုပ် ဂျက်ကွမ်းခြံကုန်းမှာ ဘယ့်နှာသို့ နားလည်ရပါအံ့လတ္တံ့နည်း။ ဤ၌နံဘေးနေ လူငယ်တစ်ယောက်ကို မေးရပါ၏ ။ အခုတစ်ခါတဲ့ ... ဆက်လက်ပြီးတဲ့ ရာဇ၀င်များရဲ့ သတို့သမီး သီချင်းနဲ့ တင်ဆက်မှာပါတဲ့ ... နားဆင်ကြပါရှင် တဲ့ ကျေးဇူးပါတဲ့။
သြော် သာဓု သာဓု ။ခေတ်၏ လူငယ်ကလေး ဘုန်းကြီးပါစေ အသက်ရှည်ပါစေ အနာမျိုး ၉၆ ပါး ကင်းရှင်းပါစေဟုသာ ကျွန်ုပ်မှာ အထပ်ထပ်အခါခါ တောင်းဆုပတ္ထနာခြွေ၍ နေရပါတော့၏ ။ အနှီ မြန်မာရည်လည်သူ အမျိုးကောင်းသားကလေး ရှင်းပြ၍သာပဲပေပေါ့။ ခေတ်၏ မြန်မာစပီကင်သံကြီးက ဂျက်တို့အဖို့ရာ ခက်-ခက်လှပါဘိတောင်း။
နှစ်
တစ်ခါကမူ ကျွန်ုပ်သည် မိတ်ဆွေတစ်စုတို့နှင့်အတူ မြို့တော်ကြီးတစ်ခု၏ ဟိုတယ်အတွင်းသို့ ရောက်သွား၏ ။ရီဆက်ရှင်နစ် (Receptionist ) ခေါ် ဧည့်ကြိုစာရေးမလေးက အနို့ကလို ခရီးဦးကြိုဆိုလာခဲ့ပါ၏ ။
''မင်လာဘာရှန်
သော်ဝင်ကြက်သေက ကြိုစိုပါဒယ် ...
ဂျုစ်တုံးဆောင်ပါရှန်''
ကျွန်ုပ်ကား အနှီခရီးဦးကြိုဆိုစကားကို မသိတစ်ဝက် သိတစ်ဝက်။ မတတ်နိုင်။ အနီးက လုလင်ကို ဘဇာတုံးဟ လုပ်ရပြန်သည်သာ။
''မင်္ဂလာပါရှင်တဲ့
တော်ဝင်ကျက်သရေက ကြိုဆိုပါတယ်တဲ့
အအေးသုံးဆောင်ပါရှင်တဲ့''
သြော် အသံထွက်တွေ ၊ အသံထွက်တွေ ။ ခေတ်အသံနှင့် ခေတ်ဟန်။ အနို့နှင့် ကျွန်ုပ်လည်း ခေတ်ကို စေ့ငုကြည့်ခဲ့ရာမပီကလာပီကလာ သူ့စကားဟူသော ခေတ်ကြီးထဲသို့ ဆိုက်ရောက်၍ နေသည်ကို သတိပြုမိလိုက်ပါ၏ ။
''ဒို့ကိုတိရား''
ယင်းမှာ တို့ကိုသိလား ဟူ၏ ။
''တွားခွင့်ပြုပါ''
ယင်းမှာ သွားခွင့်ပြုပါ ဟူ၏ ။
''တိဒယ် တိဒယ်''
ယင်းမှာ သိဒယ် သိဒယ် ဟူ၏ ။
''စုံရအောင်ကွာ''
ယင်းမှာ ဆုံရအောင်ကွာ ဟူ၏ ။
''တတိရနေပါဒယ်''
ယင်းမှာ သတိရနေပါတယ် ဟူ၏ ။
''မွင်းဂါးစားမယ်''
ယင်းမှာ မုန့်ဟင်းခါးစားမယ် ဟူ၏ ။
''ဟောက်''
ယင်းမှာ ဟုတ်ကဲ့ ဟူ၏ ။
''မှုတ်ပါဘူး''
ယင်းမှာ မဟုတ်ပါဘူး ဟူ၏ ။
''ဘူနဲ့လာတာလဲ''
ယင်းမှာ ဘယ်သူနဲ့ လာတာလဲ ဟူ၏ ။
''ဂျေဇူပြု၍ နာဆင်ဘာရှန်''
ယင်းမှာ ကျေးဇူးပြု၍ နားဆင်ပါရှင် ဟူ၏ ။
အနို့ကလိုသော ထိုသို့သော မပီကလာ သူ့စကားကလေးများနှင့် ပြောပါမှ ခေတ်နှင့်ညီသော လူသားတစ်ယောက်ဖြစ်ကာ ခေတ်အသိုက်အ၀န်းကလည်း လက်ခံကြသည်ဟု ဆိုပါ၏ ။ အကယ်၍ မြန်မာဘာသာစကားကို ဌာန်၊ ကရိုဏ်းကျကျ ဒီဃရဿ ဂရုလဟု ဃောသ အဃောသ ဓနိတ သိထိလ စည်းကမ်းကျနစွာ ပြောဆိုပါမူ ရွာဦးဘုန်းတော်ကြီးကျောင်းထွက်ဟု ယူဆကာ မျက်မှောက်ခေတ်လွန် လူ့အသိုက်အ၀န်းက အလွန်တရာ အထင်သေးကာ နှာခေါင်းရှုံ့ကြကြောင်းလည်း အချို့အချို့တို့က ကျွန်ုပ်ဂျက်ကွမ်းခြံကုန်းကို ဗဟုသုတရဖွယ်ရာ ပြောပြကြသေးကုန်ပါ၏ ။
သြော်..........မပီသသူမှာ စတား ပီသသူမှာ အလကား ဟူလို။
သုံး
အနို့နှင့် တစ်နေ့သော် ဘာမြို့နယ်အသင်း၊ ညာမြို့နယ်အသင်း ဆိုသည်များကဲ့သို့ ရန်ကုန်မြို့ရောက် သပွတ်အူသားတို့ကလည်း သပွတ်အူကျေးလက်အသင်းဟူ၍ ဖွဲ့စည်း၍ ထားခဲ့ချေရာ ထုံးစံအတိုင်း သပွတ်အူဇာတိသားတို့ တစ်နှစ်တစ်ကြိမ် တွေ့ဆုံကြသော ပွဲကလေးတစ်ခု ၀ှဲချီးကျင်းပကြပါကုန်၏ ။ ဤ၌ အခမ်းအနားမှူးအဖြစ် ကျွန်ုပ်အား ခန့်အပ်၍လာခဲ့ချေရာ ကျွန်ုပ်ကား မပီကလာ သူ့စကားတို့ဖြင့် ခေတ်နှင့်အညီ အပြေးလိုက်ပစ်ခဲ့ပါ၏ ။
''ဂျေဇူပြူ၍ နာဆင်ဘာ
အဂန်နာ စတင်တော့မှာဘာ
သပွတ်အူ မွင်းဂါးနဲ့ သုံးဆောင်ပြီးနောက်...
အဂန်နာကို စမှာဘာ
ဂျေဇူဘာ''
ကျွန်ုပ်က ကျေးဇူးပြု၍ နားဆင်ဖို့အကြောင်း၊ အခမ်းအနား စတင်တော့မည့်အကြောင်း၊ မုန့်ဟင်းခါးသုံးဆောင်ကြဖို့အကြောင်းများကို ကြေညာထည့်လိုက်သောအခါ ပရိသတ်မှာ ရွရွ ရွရွ ဖြစ်သွား၏ ။
''ဂန်နာမာ...ဒူဂျွန်ကျောင်သာမျာအာ ဆုချီးမြင့်မာဘာ''
အခမ်းအနားမှာ ထူးချွန်သည့်ကျောင်းသားများအား ဆုချီးမြှင့်မည့်အကြောင်းကိုလည်း ကျွန်ုပ်က ထည့်သွင်းကြေညာပေးလိုက်ပါ၏ ။
''ဂန်နာမာ...ရွှေပွတ်သန်းဇင် တေးဂီတဘွဲ့မလဲ...တေးသံသာများနဲ့ သီဆိုပေသွာမဘာ''
အခမ်းအနား၌ ရွှေပွတ်သံစဉ် တေးဂီတအဖွဲ့မှလည်း သီချင်းများနှင့် သီဆိုပေးသွားမှာပါဖြစ်ကြောင်း ကျွန်ုပ်က ကြေညာပေးလိုက်ပါ၏ ။
''ဒိပြင်...ဘိုဘိုဘွာဘွာများကိုလည်း ဂဒေါငွေများ ပေအပ်မဘာ''
သည့်အပြင် အဘိုးအဘွားတို့အား ကန်တော့ငွေများ ချီးမြှင့်မည့် အကြောင်းကိုလည်း ကျွန်ုပ်က သို့ကလို ကြေညာပေးခဲ့ပါ၏ ။
အနို့နှင့် ဆိုကြပါစို့ ။ အနှီပွဲကြီး ၀ှဲချီးကျင်းပ၍ ပြီးပြန်လေသောအခါလေးဆယ်ကျော် ငါးဆယ်တစ်ဝိုက် လူတွေက ဂျက်ကွမ်းခြံကုန်းတစ်ယောက် မပီကလာ ပီကလာနှင့် သူငယ်များ ပြန်သွားလေပြီလားဟု သုံးသပ်ကြသည် ဟူသတတ်။ လူငယ်ထု တစ်ရပ်လုံး ကမူ အန်ကယ်ဂျက်အသံကတော့ လန်းမှလန်းပဲဗျာ ဟု ကောက်ချက်ချကြသော ဟူ၏ ။ ဂျဂါးအပီတူ (သို့မဟုတ်) စကားမပီသူများ၏ ခေတ်ကာလပါပေတမုံ့တကား...။
ဂျက်ကွမ်းခြံကုန်း
(ရတီမဂ္ဂဇင်း၊ မေ - ၂၀၁၀)
No comments:
Post a Comment