အိုရမယ်
နာရမယ်။
သေရမယ်။
ဒါက ကမ္ဘာပေါ်က လူသားတိုင်းရဲ့ ဘ၀နေ၀င်ချိန်သမာရိုးကျ ဇာတ်ကွက်တွေဖြစ်ပါတယ်။ တမူဆန်းသူတွေလည်း ရှိနေနိုင်ပါတယ်။ မအိုခင်နာရတာမျိုး၊ မအိုခင်သေရတာမျိုး။ ဒါကတော့ တစ်ပိုင်း။ အခုကျွန်တော်ပြောချင်တာက ကျွန်တော်တို့ဘယ်လိုပုံစံ၊ ဘယ်လိုလမ်းကြောင်းနဲ့အိုကြမလဲ။ ဒီနေ့ခေတ်ကမ္ဘာ့လူဦးရေရဲ့ ၇ ရာခိုင်နှုန်းဟာ လူအိုတွေပဲလို့ ကျွန်တော်တို့သိခဲ့ရပြီးပါပြီ။ တစ်နေ့ ကျွန်တော်တို့ကိုယ်တိုင်လည်း ဒီသတ်မှတ်ချက်ထဲမှာ ပါဝင်ကြရမှာပါ။ ဟုတ်ပါတယ်။ ဘယ်လိုပုံစံနဲ့ ကျွန်တော်တို့ပါဝင်ကြမလဲ။ သားကြီးနဲ့သူ့မိသားစုက နိုင်ငံခြားမှာစားသောက်ဆိုင်လုပ်ငန်း၊ သမီးအလတ်က တက္ကသိုလ်မှာ ကထိက၊ သမီးအငယ်ဆုံးက အထူးကုဆေးခန်းကြီးတစ်ခုရဲ့ ပါရဂူများစာရင်းဆိုင်းဘုတ်ပေါ်မှာ နေရာတစ်နေရာရသူ။ ဒီလို သားသမီးတို့ကိုပိုင်ဆိုင်ထားသော အသက်၆၀ကျော်အဘွားကြီးတစ်ယောက်။ နွေရာသီရောက်ရင်တော့ တောင်ပေါ်မြို့ကလေးရဲ့ တိုက်သစ်ကြီးမှာ ကျန်းမာရေးအတွက်သွားပြီး အပန်းဖြေတတ်သေး။ ဒီလိုအဆင့်အတန်းနဲ့ လူအိုတွေအတွက်ကတော့ အိုခြင်းဆိုတာ ဒုက္ခပါးပါးလေးသာ။ ယောက်ျားက ပန်းရံလုပ်ရင်းတိုက်ပေါ်က ပြုတ်ကျပြီးကွယ်လွန်၊ သားကြီးကလည်း ဖားကန့်ဘက်အလုပ်လုပ်သွားမယ်ဆိုပြီး ပြန်မလာတော့တာ ၆နှစ်၊ သမီးကလေးက စတိုးဆိုင်မှာအရောင်းဝန်ထမ်း၊ ကိုယ်တိုင်ကတော့ ယိုင်နဲ့နဲ့စုတ်ချာချာတဲကလေးထဲမှာ ပန်းနာရင်ကြပ်ရောဂါနဲ့နေ့စဉ်စစ်ခင်းပြီးနေရသူ၊ အသက်၆၀ကျော်အဘွားကြီး။ ဒီလိုလူမျိုးတွေအတွက်ကျတော့ အိုခြင်းဆိုတာ ရှေ့မှာကာထားတဲ့ တံတိုင်းကြီး၊ ခေါင်းပေါ်ရွက်ထားတဲ့ ကျောက်တုံးကြီး၊ ခြေထောက်ကိုချည်ထားတဲ့ သံကြိုးကြီး။ တချို့သောအိုခြင်းမျိုးက ပိုဆိုးပါသေးတယ်။ ကျောထောက်နောက်ခံဆွေမျိုးမရှိလို့၊ သားသမီးတွေအားလုံးက တစ်နယ်တစ်ကျေးမှာမို့၊ သားသမီးတွေကိုယ်တိုင်ကိုက ပြုစုချင်စိတ်မရှိကြတော့လို့၊ စတဲ့ဒီလိုအကြောင်းပြချက်တွေကြောင့် လူအိုရုံလို့ခေါ်တဲ့နေရာတစ်ခုကို အဘိုးအို၊အဘွားအိုတို့ ရောက်ခဲ့ကြရပါတယ်။ တဲ့တိုးခေါ်တော့ လူအိုရုံ၊ နည်းနည်းဖျော့ခေါ်တော့ ဘိုးဘွားရိပ်သာပေါ့။ အိုမင်းခြင်းဟာ ကမ္ဘာကြီးရဲ့ ကြောက်စရာကောင်းသောကပ်ရောဂါတစ်ခုလို နေ့စဉ်နဲ့အမျှကြီးထွားလာပါတယ်။ ကျွန်တော်တို့ထက် လူနေမှုအဆင့်အတန်း၊ ပညာအဆင့်အတန်းမြင့်မားတဲ့ ဂျပန်လိုနိုင်ငံမျိုးမှာတောင် လူအိုတွေအပေါ် ထားရှိတဲ့ဂရုစိုက်မှုတွေဟာ ခေါင်းပါးလာကြောင်း ကျွန်တော့်မိတ်ဆွေတစ်ယောက်ရဲ့ စကားကို ကိုးကားပြီး ပြောချင်ပါတယ်။ သူတို့နိုင်ငံမှာ သက်ကြီးရွယ်အိုတွေနဲ့ ဆွေမျိုးမြေးမြစ်တွေဟာ တစ်နေရာစီနေကြပါသတဲ့။ ခေတ်ကြီးရဲ့လိုအပ်ချက်အရ တစ်ရက်ကို အလုပ်ချိန် ၁၂နာရီလောက်လုပ်နေရတဲ့ဘ၀မှာ မိဘဘိုးဘွားတွေကို ၂ရက်နေလို့ တစ်ခါတောင် သွားမကြည့်နိုင်ပါဘူးတဲ့။ မနက်အိပ်ရာနိုးလို့ ရေနွေးအိုးတည်တာဖြစ်ဖြစ်၊ သန့်စင်ခန်းဝင်တာဖြစ်ဖြစ် အဘိုးအဘွားတို့က နေ့စဉ်လုပ်ငန်းစဉ်တစ်ခုကို လုပ်ဆောင်တဲ့အခါမှာ သားသမီးမြေးမြစ်တို့ရဲ့ အိမ်မှာ အချက်ပေးခေါင်းလောင်းကလေးတွေက မြည်ပါတယ်။ သဘောကတော့ အဘိုးအဘွားတို့ရဲ့အိမ်နဲ့ ဆွေမျိုးသားသမီးတို့ရဲ့အိမ်ကို စနစ်တစ်ခုနဲ့ချိတ်ဆက်ထားတယ်ပေါ့။ နေ့စဉ် အချက်ပေးခေါင်းလောင်းသံကြားနေသရွေ့ စိတ်မပူမိကြပါဘူး။ အချက်ပေးခေါင်းလောင်းသံမကြားရတဲ့နေ့မျိုးမှာမှ တစ်ခုခုများဖြစ်သလားဆိုပြီး အပြေးအလွှားသွားကြည့်ကြပါသတဲ့။ ခေတ်ကြီးကြောင့်ဖြစ်ပေါ်လာတဲ့ ရင်နာစရာအလေ့အကျင့်တစ်ခုပါပဲ။
ကျွန်တော်တို့ လူမျိုးတွေထဲမှာ လူအိုရုံတစ်ခုကို ပထမဆုံးတည်ထောင်ခဲ့သူက မန္တလေးမြို့သူ ဒေါ်ဦးဇွန်း။ သူ့ရဲ့ မိဘနှစ်ပါးကွယ်လွန်သွားတော့ ရန်ကုန်ကို စိတ်ပြေလက်ပျောက်ဘုရားဖူးထွက်လာရင်း ပြင်သစ်ခရစ်ယာန်သီလရှင်တွေရဲ့ လူအိုရုံကို ၀င်လေ့လာဖြစ်ပြီး သူလည်းဒီလိုလုပ်မယ်လို့ ဆုံးဖြတ်ချက်ချလိုက်သူပါ။ ၁၁.၁.၁၉၁၅မှာ သီလရှင်ကြီးဒေါ်ဥတ္တမစာရီနဲ့အတူ မင်းကွန်းခေါင်းလောင်းကြီးရဲ့အရှေ့ကမြေနေရာလေးမှာ ဘိုးဘွား(၃)ဦးကို ပြုစုရင်း ပထမဆုံးဗုဒ္ဓဘာသာလူအိုရုံတစ်ခုကို တည်ထောင်ခဲ့ပါတယ်။ အဲဒီတုန်းကတော့ ဘိုးဘွားအရေအတွက်နည်းနည်းဆိုတော့ အကြင်နာတွေ၊ မေတ္တာတွေ၊ နားလည်မှုတွေ၊ ကိုယ်ချင်းစာတရားတွေ ပုံအောပြီးပေးနိုင်ခဲ့မယ်ပေါ့ဗျာ။ ဒီနေ့ခေတ်ရဲ့ လူအိုရုံတွေထက်တော့ ပိုပြီးနွေးထွေးမယ်ထင်ပါတယ်။ ဒါတွေကထားတော့ သမိုင်းဖြစ်ခဲ့ပြီ။
ဒီနေ့ခေတ်မှာတော့ သူစိမ်းသက်ကြီးရွယ်အိုကိုမပြောနဲ့၊ ကိုယ့်မိဘဘိုးဘွားအရင်းအပေါ်ကိုတောင် စာနာမှုတွေ ခေါင်းပါးလာကြပါတယ်။ "ဘုရားရှိခိုးရင် အကျယ်ကြီးမလုပ်နဲ့လေဗျာအမေ။ ဒီမှာ ဘောလုံးပွဲကြည့်နေတာအာရုံနောက်တယ်ဗျ"လို့ အပြောခံရလို့ သူ့အတွက်ပေးထားတဲ့အခန်းလေးထဲမှာ ဘုရားစာကိုအသံထွက်ရုံလေးရွတ်နေရတဲ့ အမယ်အိုတွေကို ကျွန်တော်တို့တွေ့လာရပါတယ်။ "အမေရယ်...တရားစခန်းဝင်တာ ငါးရက်၊တစ်ပတ်ဆို တော်ရောပေါ့။ ဘာလို့ ၁လလောက်ဝင်မှာလဲ၊ အမေ့မြေးတွေဝေယျာဝစ္စက အမေလုပ်မှ အဆင်ပြေတာအမေလည်းအသိ"ဆိုတဲ့ စကားတွေကိုလည်း ကျွန်တော်တို့ကြားလာရပါတယ်။ "မဟုတ်လည်း အဖေက ညဖက်သိပ်အိပ်တာမှမဟုတ်တာ။ စက်ရုံတစ်ခုခုမှာ ညစောင့်လေးဘာလေးလုပ်ပါလား၊ အဖေ့လက်ဖက်ရည်ဖိုးလေးကာမိတာပေါ့"ဆိုတဲ့ ငြိုငြင်သံတွေကို ကျွန်တော်တို့ကြားလာရပါတယ်။ အိုမင်းမစွမ်းဆိုတဲ့စကားလုံးမှာကိုက အိုမင်းရင်မစွမ်းတော့ဘူးလို့ အဓိပ္ပာယ်ထွက်နေခဲ့တာလား။ ရှိပါစေတော့။ ဘယ်ခေတ်မှာနေနေ၊ ဘယ်လိုယဉ်ကျေးကျေး၊ ဘယ်လိုမိုက်ရိုင်းရိုင်း ကျွန်တော်တို့ကရော မအိုကြတော့မှာ သေချာရဲ့လား။ ငါသာလူအိုတစ်ယောက်ဖြစ်လာခဲ့ရင်၊ ငါသာလူအိုရုံမှာ နေနေရရင်ဆိုပြီး မစဉ်းစားကြတော့ဘူးလား။ ကျွန်တော်ကတော့ ကဗျာဆရာမှူးနေ၀န်းရဲ့ ကဗျာတစ်ပုဒ်ကြောင့် အတွေးပွားမိပါတယ်။ ခေါင်းစဉ်က "လူအိုရုံ"။
ကြယ်သီးပေါက်တွေမှားတပ်မိတာကအစ
ကိုယ့်အိပ်ရာကို ပြန်မေ့လျော့နေတာကအဆုံး
လွဲချော်မှုတစ်ခုခုမရှိတဲ့နေ့ဟာ
တစ်ခုခုလွဲချော်နေပြီ။
ပြူတင်းပေါက်သံတိုင်ကို ကိုင်လိုက်တော့အေးစက်နေတယ်
အရင်တုန်းကဒီလမ်းမှာလျှောက်ဖို့
ဖိနပ်ဆိုဒ်သေးသေးရှိရင်ရပြီ
အခုတော့ရေခဲမုန့်မကြိုက်ချင်တော့ဘူး
ရောင်စုံဘောလုံးဆိုတာ
ထိတ်လန့်ဖွယ်ပေါက်ကွဲတတ်တဲ့အရာ။
လက်ကောက်ဝတ်မှာပုတီးပွန်းလို့နာနေတယ်
ထမင်းချက်ဆောင်ကမီးခိုးငွေ့တွေအူရင်
ဘာကိုသတိရမိမှန်းမသိ။
များသောအားဖြင့်က အိုရင်မေ့ပြီ။ ငယ်ရည်းစားနာမည်ကိုမေ့ပြီ။ တက်ခဲ့တဲ့ကျောင်းနာမည်ကိုမေ့ပြီ။ ကိုယ့်မှာအ၀တ်ဘယ်နှစုံရှိလဲမေ့ပြီ။ မနက်ကစားခဲ့တဲ့ဟင်းကိုမေ့ပြီ။ လမ်းထိပ်ကသစ်ပင်လေးကိုမေ့ပြီ။ ကိုယ့်မှတ်ပုံတင်နံပါတ်ကိုမေ့ပြီ။ ခေါင်းအုံးအောက်က ရှူဆေးဗူးကိုမေ့ပြီ။ မေ့တာနဲ့တစ်ဆက်တည်းကမှားတော့မယ်။ မျက်မှန်ကိုစာအုပ်ကြားမှားညှပ်တယ်။ ကြယ်သီးကို အပေါက်မှားတပ်တယ်။ ယောဂီတဘက်ကို ထမီတွေနဲ့ မှားသိမ်းတယ်။ တရားစာအုပ်ကိုဆေးပုလင်းတွေနား မှားထားတယ်။ လူအိုရုံတစ်ခုရဲ့တစ်နေ့တာဟာ ဘာမှလွဲချော်မှုမရှိဘူးဆိုတာမဖြစ်နိုင်ပါတဲ့။ ဟုတ်ပါတယ်။ သူတို့က လူအိုတွေလေ။ ပြီးတော့ပြတင်းပေါက်သံတိုင်တွေ အေးစက်နေတဲ့အကြောင်း။ ဒါကတော့ သူတို့ရင်ထဲမှာအေးစက်ခြင်းကကြီးစိုးနေပုံ။ ဆွေမဲ့မျိုးမဲ့ဖြစ်ရင်ဖြစ်၊ ရှိတဲ့ဆွေမျိုးကလည်း မကြည်ဖြူဖြစ်ရင်ဖြစ်။ ဒီလိုအခြေအနေမျိုးကြောင့်ဒီလိုနေရာမှာလာနေရတာ။
ပြတင်းပေါက်ကတဆင့်မြင်နေရတဲ့နံရံကြီးကိုငေးရင်း၊ ပြုစုစောင့်ရှောက်သူတွေရဲ့မျက်နှာကိုငေးရင်း မိမိကိုရှင်ကွဲခွဲသွားသောသားသမီးများအကြောင်း၊ မိမိကိုသေကွဲခွဲသွားသောသားသမီးများအကြောင်း၊ ဘယ်အကြောင်းကိုပဲဖြစ်ဖြစ်တွေးမိရုံနဲ့ ရင်ထဲမှာဆတ်ခနဲ တောင့်ခနဲ အေးသွားမှာပဲလို့ ကျွန်တော်နားလည်ပေးနိုင်ပါတယ်။ ပြီးတော့ ငယ်ငယ်တုန်းကခံစားမှုနဲ့ အခုခံစားမှု။ ငယ်ငယ်ကတော့ အဆွေအမျိုးမိဘမောင်ဘွားသိုက်သိုက်ဝန်းဝန်းနဲ့လမ်းမှာ ပေါ့ပေါ့ပါးပါးသေးသေးကွေးကွေးဖိနပ်လေးနဲ့လျှောက်ခဲ့တယ်။
သောကသေးသေး၊ ပျော်ရွှင်မှုကြီးကြီး။ ဘ၀ကအပေါ့ပါးဆုံးအချိန်။ ဒီထက်နည်းနည်းအရွယ်ရောက်လာတော့ ဖိနပ်ကနည်းနည်းလေးလာပါတယ်။ အိမ်ထောင်ပြုတယ်၊ သားသမီးတွေပွားစီးတယ်။ ၀မ်းရေးရုန်းကန်ရတယ်။ မိသားစုကဆွဲထားတဲ့သံယောဇဉ်ကြိုး၊ ငယ်ထိပ်ပေါ်တက်ထိုင်နေတဲ့စီးပွားရေးအခက်အခဲတွေကြောင့် ဘ၀လမ်းပေါ်လျှောက်ရတာဖိနပ်ကမသေးတော့။ မပေါ့တော့။ အခုအရွယ်လူအိုရုံမှာရောက်နေရချိန်မှာရော။
နောက်ဆံမတင်းစရာမရှိတာကို နောက်ဆံတင်းချင်နေသေးတဲ့စိတ်ကို ကြိုးစားမေ့လိုက်၊ လူဖြစ်ရခြင်းအပေါ်တွယ်တာစိတ်ကလေးကိုကြိုးစားဖျောက်လိုက်၊ သံသရာအတွက်အကျိုးရှိရာတရားဓမ္မကို ဖွေရှာလိုက်။ ဒီလိုနဲ့ ဖိနပ်တွေဟာလေးလာခဲ့ရတော့တာပါပဲ။ ကလေးဘ၀ကနှစ်ခြိုက်ပျော်ရွှင်ခဲ့ရတဲ့အရာတွေဟာလည်း ပျော်ရွှင်အောင်မစွမ်းဆောင်ပေးနိုင်တော့။
ဘောလုံးလှလှတွေကို ဖောင်းခနဲဖောင်းခနဲတက်ထိုင်ပြီးဖောက်ပစ်ခဲ့တဲ့အရွယ်ကနေ သာမန်ထက်ပိုကျယ်တဲ့အသံလေးတစ်ခုလောက်ကြားရုံနဲ့ ရင်တထိတ်ထိတ်ဖြစ်နေရတဲ့အရွယ်ကို ရောက်ခဲ့ပြီလေ။ ပုတီးကရော။ သံသရာအတွက်ရိက္ခာလား၊ ကိုယ့်အပူကိုယ်မရိပ်မိအောင် အသုံးချစရာလေ့ကျင့်ခန်းတစ်ခုလား။ လက်ကောက်ဝတ်မှာတော့ ဒဏ်ရာဖြစ်ခဲ့ပြီပေါ့။ စေတနာရှင်အလှူရှင်တချို့နဲ့ လူအိုရုံရဲ့ဘဏ္ဍာငွေထဲကလာတဲ့ ထမင်းတွေကို စားရပါများတော့လည်း ရှောရှောရှူရှူစားတတ်ပြီ။ ထမင်းချက်ဆောင်ဆီက မီးခိုးတွေအူလာရင်တော့ ဘာကိုသတိရမိမှန်းမသိ။ ဘာကိုတွေးမိမှန်းမသိ။ ဒီဘ၀ကိုစိတ်နာရမှာလား။ ဒီဘ၀ကိုကျေးဇူးတင်ရမှာလား။ သူတို့လည်းမသိ။ ကျွန်တော်လည်းမသိ။ ကဗျာဆရာလည်းမသိ။
တတိယကမ္ဘာစစ်ဟာ အခန်းထောင့်တိုင်းမှာတိတ်တဆိတ်ဖြစ်လို့
တစ်ယောက်မျက်နှာကို တစ်ယောက်ကြည့်မိ
တစ်ယောက်မျက်ဝန်းကို တစ်ယောက်ကြည့်မိ
ပြီးတော့ တစ်ယောက်မျက်ခွံကို တစ်ယောက်ကြည့်မိ
တစ်ယောက်မျက်ရည်ကို တစ်ယောက်မမြင်ခင် ခေါင်းငုံ့သွားကြ
သို့မဟုတ်ခေါင်းခါလိုက်ကြ။
ကြာခဲ့ပါပြီ
ဘယ်အသံမှမမြည်တော့သလို
ဘယ်အမည်မှလည်း မသန်တော့ပါဘူး
ကြာခဲ့ပါပြီ။
ဆူညံပေါက်ကွဲနေတဲ့အသံတွေကသာ ကြောက်စရာလို့ ထင်ပါသလား။ ဘာအသံမှမထွက်တဲ့တိတ်ဆိတ်ခြင်းမျိုးကရော ကြောက်စရာမကောင်းဘူးတဲ့လား။ အသံမထွက်တဲ့စစ်ပွဲတွေဟာ ရင်ထဲမှာ၊ အခန်းထောင့်မှာ၊ ခေါင်းအုံးပေါ်မှာ၊ စတီးမတ်ခွက်ထဲမှာ၊ ပြတင်းပေါက်ကမြင်ရတဲ့နံရံမှာ၊ စားပွဲပေါ်တင်ထားတဲ့ပရဆေးထုပ်လေးနားမှာ၊ ဆီးဟောင်းနံ့ထွက်နေတဲ့စောင်ပါးလေးတစ်ထည်ထဲမှာ ၀ုန်းဒိုင်းကြဲအောင်ဖြစ်လို့ပေါ့။ တစ်ယောက်မျက်နှာကိုတစ်ယောက်လှမ်းကြည့်တယ်။ သူရောငါ့လိုပဲလား။ တိတ်ဆိတ်ခြင်းမှာရင်တထိတ်ထိတ်လား။ နေ့လည်စာစားဖို့လာမခေါ်သေးတာကိုစောင့်ရင်း ဘုရားစာလေးတစ်ပိုဒ်လောက်ခပ်တိုးတိုးရွတ်ရမလား။ သာကြောင်းမာကြောင်းလှမ်းပြောရမလား။ တစ်ခုခုအသံထွက်ဖို့ကြိုးစားတိုင်း မျက်လုံးချင်းဆုံတာနဲ့ဆွံ့အသွားကြ။ ညက ရှိုက်သံသဲ့သဲ့ကြားမိသေးတယ်။ ငိုနေတာသူလား။ ဧည့်တွေ့မလာတာ ၄နှစ်ရှိပြီဖြစ်တဲ့ တစ်ခုတင်ကျော်က အမကြီးလား။ မငိုဘဲကျကျလာတဲ့ မျက်ရည်တွေကို ဘယ်သူမှမမြင်ခင် ခေါင်းငုံ့ခါထုတ်လိုက်ကြပါတယ်။ ပျိုရွယ်စဉ်ဘ၀အလွမ်းအဆွေးတွေနဲ့ လက်ရှိအထီးကျန်စိတ်ကုန်မှုတွေပါသွားမလားလို့ပေါ့။ ဘ၀တူတွေဆိုတာက တစ်ယောက်မျက်ရည်တစ်ယောက်မမြင်မိဖို့ သိပ်အရေးကြီးတယ်လို့ ကျွန်တော်ကဖြင့်ထင်မိတာပါပဲ။
အချိန်နဲ့အိပ်၊ အချိန်နဲ့ထ၊ အချိန်နဲ့အပြင်ထွက်၊ အချိန်နဲ့စား၊ အချိန်နဲ့ဆေးသောက်၊ အချိန်နဲ့လမ်းလျှောက်၊ အချိန်နဲ့တရားမှတ်။ ဒီလိုအခြေအနေ၊ ဒီလိုဘ၀မျိုးမှာ ဘာတွေကိုပြောဆိုနေကြရဦးမှာလဲ။ ကျောင်းသားပေါင်းမြောက်မြားစွာကို
မွေးထုတ်ပေးခဲ့တဲ့ ကျောင်းဆရာမကြီးလား။ တွဲတွေပေါ်မှာပြေးလွှားပြီးတာဝန်ကျေခဲ့တဲ့ လက်မှတ်စစ်ကြီးလား။ အရပ်တကာပွဲတကာလှည့် မီးရောင်အောက်မှာလက်ခုပ်သံတွေရခဲ့တဲ့မင်းသမီးကြီးလား။ နေပူပူမိုးရွာရွာ စက်ဘီးကလေးတစ်စီးနဲ့အိမ်ပေါက်စေ့ရောက်ခဲ့တဲ့ စာပို့သမားကြီးလား။ ထားခဲ့ရပြီ။ နာမည်တွေ၊ ဂုဏ်ဒြပ်တွေ၊ ဘ၀တွေ။ ထားခဲ့ရပြီ။ ဒီအသိုက်အမြုံလေးရဲ့အ၀င်မှာကတည်းက အားလုံးကိုပစ်ချ။ ငါဟာလူအိုတစ်ယောက်ပဲဆိုတဲ့ ရိုးရှင်းတဲ့အမည်နာမတစ်ခုကို ရွေးချယ်ခဲ့ရပြီးပြီ။ ဘာကိုမှအသံထွက်ရှင်းပြစရာမလိုတော့။ ဒီအကြောင်းကို ကဗျာဆရာက အသံထွက်တူ၊ အဓိပ္ပာယ်ကွဲစကားလုံးတချို့ကိုရှေ့နောက်ကစားပြီးဖွဲ့ပါတယ်။ "အသံမမြည်၊ အမည်မသန်"တဲ့။
ငါကတစ်ခုခုကိုပြင်ဆင်ဖို့စိတ်ကူးနေချိန်
ဟိုနားမှာ တစ်ခုခုအတွကိဆင်နေပြင်နေကြပြီ
သစ်ရွက်ကြွေရင် ခိုးခိုးခစ်ခစ်ရယ်ချင်ခဲ့တယ်ဆိုတာ ဟုတ်မှာ
အခုတော့ အူလှိုက်သည်းလှိုက်ပေါ့။
လူအိုရုံကို
လူအိုတွေမယုံကြဘူး။
ဒီလိုအားငယ်ထိတ်လန့်မှုတွေ၊ ဒီလိုအလိုမကျဝမ်းနည်းမှုတွေကို ပြင်ဆင်ဖို့ ဘ၀ကအချိန်နည်းလွန်းနေပါပြီ။ အလှူရှင်တွေလာပြီး ကျွေးမွေးတဲ့ထမင်းဝိုင်းမှာစားဖို့ ကိုယ့်အ၀တ်အစားတွေသန့်သန့်ပြန့်ပြန့်ရှိနေအောင်လည်း ပြင်ဆင်ရသေးတယ်။ သူတို့ကျွေးတဲ့ထမင်းကိုစားနေချိန် သူတို့မျက်လုံးတွေရှေ့မှာ ပျော်ချင်ယောင်ဆောင်ရဦးမယ်လေ။ ကိုယ့်အနီးအနားက ဘ၀တူတွေမှာပြင်ဆင်နေရင်းကကို ပြင်ဆင်ချိန်မရလိုက်တာတွေ အများကြီးတွေ့ဖူးပြီ။ တရားစာအုပ်လေးလက်တစ်ကမ်းမှာထားအိပ်ရင်း ဘယ်တော့မှပြန်နိုးမလာသောဘ၀တူတွေ၊ ပုံမှန်သောက်နေကျဆေးလုံးလေးတွေကို ပါးစပ်ထဲပစ်ထည့်ရင်း ခေါင်းငိုက်စိုက်ကျသွားသောဘ၀တူတွေ၊ အဓိပ္ပာယ်မဲ့တဲ့စကားတွေဆိုရင်း တငိုငိုတရယ်ရယ်ဖြစ်လာလို့ တခြားအသိုက်အမြုံတစ်ခုကို ပြောင်းရွှေ့ခံလိုက်ရသောဘ၀တူတွေ၊ ကိုက်ခဲနေတဲ့ဒူးနှစ်ဖက်ကိုဖိရင်း"ဒဏ်ကြေလိမ်းဆေးလေးရှိရင်နည်းနည်းမျှပါ''လို့ ပြောနေတဲ့ဘ၀တူတွေ။ ကိုယ့်ဘ၀ကို ပြင်ဆင်ဖို့မစွမ်းသာတော့ ပတ်ဝန်းကျင်ရဲ့ပြင်ဆင်ခြင်းကို ကောင်းကောင်းဆိုးဆိုးခံလိုက်ကြရတာပါ။
ငယ်ငယ်ကတော့ သစ်ရွက်လေးကြွေရင်တောင် ရယ်ချင်ခဲ့တာပေါ့။ ဘာမှမဟုတ်တဲ့ အသေးအမွှားကိစ္စလေးတွေကိုတောင် လတ်ဆတ်နုနယ်တဲ့နှလုံးသားက ပျော်ပျော်ရွှင်ရွှင်ခံစားနေခဲ့တာလေ။ အခုကတော့ ကိုယ့်နှလုံးခုန်သံကိုတောင် ကိုယ်ပြန်သတိထားနေရတဲ့အဖြစ်။ အိပ်ရာပေါ်မှာတစ်ဖက်ကနေ တစ်ဖက်လှည့်ဖို့တောင် ၁၅မိနစ်လောက်အချိန်ယူရတဲ့အဖြစ်၊ ယောင်ယမ်းနေတဲ့ခြေဖမိုးတွေကို စောင်နဲ့အုပ်ပြီး ကိုယ့်ကိုယ်ကိုလိမ်ညာနေရတဲ့အဖြစ်။ သစ်ရွက်ကြွေလေးမြင်ရင်တောင် ငယ်ငယ်ကလို ခိုးခိုးခစ်ခစ်အသံထွက်မှာမဟုတ်တော့။ ငါလည်းဒီလိုကြွေတော့မှာဆိုပြီး အားရပါးရရယ်မောနှစ်သိမ့်မိမယ်ထင်ပါတယ်။ ဘ၀ကြီးကိုလှောင်ပြောင်တွန်းထုတ်ပစ်ဖို့ ရယ်သံတချို့ဟာ အားတစ်ခုဖြစ်ကောင်းဖြစ်နိုင်ပါရဲ့။ ပါးပေါ်မှာတော့ မျက်ရည်တွေရှိနေမှာပေါ့။
ကဗျာဆရာရဲ့အဆုံးသတ်က ကျွန်တော့်နှလုံးသားကို ဆတ်ခနဲကိုင်လှုပ်ပစ်လိုက်တယ်။ ဒါက ကျွန်တော်တို့ဘာသာစကားရဲ့အသံတူ၊အဓိပ္ပာယ်ကွဲ စကားလုံးတချို့အပေါ်သူ့ရဲ့ပါးနပ်စွာ အခွင့်အရေးယူအသုံးချခြင်းလည်းဖြစ်ပါတယ်။ "လူအိုရုံကို လူအိုတွေမယုံကြဘူး"တဲ့။ ကိုယ်နေထိုင်ပျော်ဝင်ရပ်တည်နေတဲ့နယ်ပယ်တစ်ခုကို အယုံအကြည်ကင်းမဲ့ခြင်းလောက်ဆိုးဝါးတဲ့အဖြစ်မျိုးရှိပါဦးမလား။ ပန်းချီဆရာတစ်ယောက်ဟာ သူ့အနုပညာသက်သက်နဲ့ သူ့မိသားစုဝမ်းရေးကိုမဖြေရှင်းပေးနိုင်တဲ့အခါ သူ့အနုပညာကိုသူယုံပါဦးမလား။ ကဗျာဆရာတစ်ယောက်ဟာ ကဗျာရေးခြင်းသက်သက်နဲ့ မြို့ပြမှာရပ်တည်မှုအခက်အခဲဖြစ်လာတဲ့အချိန် သူ့အနုပညာကိုသူယုံပါဦးမလား။ ဂီတသမားတစ်ယောက်ဟာ သူ့ရဲ့ဖန်တီးမှုတွေကို ဘီယာဆိုင်၊အရက်ဆိုင်မှာပဲ ထုတ်ပြနေရတဲ့ဘ၀မှာ သူ့အနုပညာသူယုံပါဦးမလား။ ကျွန်တော်ဆိုလိုချင်တာက သူတို့ဟာ ၀မ်းရေးအတွက်အနုပညာကိုဖန်တီးမှာလား၊ အနုပညာစစ်စစ်ကိုဖန်တီးမှာလား။ သူတို့အားလုံးကိုယ်တိုင်က အတင်းကြိတ်မှိတ်ယုံကြည်နေသေးတယ်ထားဦးတော့။ ဘ၀တူအနုပညာသမားတွေနဲ့ ခံစားသူပရိတ်သတ်စစ်စစ်တွေကရော ယုံပါဦးမလား။ ပရဟိတသမားက လူမှုရေးလုပ်ငန်းတွေကို မယုံကြည်တော့တာမျိုး၊ ဆရာဝန်ကဆေးပညာကို မယုံကြည်တော့တာမျိုး၊ လူအိုတွေက သူတို့အသိုက်အမြုံလေးကို မယုံကြည်တော့တာမျိုး၊ ပန်းချီဆရာက အရောင်တွေကို မယုံကြည်တော့တာမျိုး၊ စစ်သားက တိုက်ပွဲတွေကို မယုံကြည်တော့တာမျိုး၊ ဂျာနယ်လစ်က သတင်းတွေကို မယုံကြည်တော့တာမျိုး၊ ကဗျာဆရာက စကားလုံးတွေကို မယုံကြည်တော့တာမျိုးကတော့ ကမ္ဘာမှာကြောက်စရာအကောင်းဆုံးမယုံကြည်ခြင်းတွေလို့ ကျွန်တော်ကဖြင့် ခံစားမိတော့တာပါပဲ။
ဟိန်း
၉.၃.၂၀၁၃
No comments:
Post a Comment