Wednesday, January 1, 2014
မုဆိုးမ စစ်တမ်း
စာရေးဆရာမကြီးဂျာနယ်ကျော်မမလေးဟာ
မုဆိုးမဘ၀နဲ့ ဆယ်နှစ်ကြာမှ
နောက်အိမ်ထောင်ပြုခဲ့တယ်။
သတင်းစာဆရာမကြီးလူထုဒေါ်အမာဟာ
မုဆိုးမဘ၀နဲ့ နှစ်ပေါင်းများစွာကြာမှ
ကွယ်လွန်ခဲ့တယ်။
ဂျက်ကလင်းကနေဒီဟာ
မုဆိုးမဘ၀နဲ့ တော်တော်ကြာမှ
သူဌေးကြီး အိုနာစစ်နဲ့လက်ထပ်ခဲ့တယ်။
ငါ့မိတ်ဆွေ မုဆိုးမ
နောက်အိမ်ထောင်ပြုပြီးမှ
သားတွေနဲ့ အမွေကိစ္စ
တရားတပေါင်ဖြစ်ရတယ်။
အိမ်နားက မုဆိုးမ
သားလေးတက္ကသိုလ်ရောက်မှ
နောက်အိမ်ထောင်ပြုရရှာတယ်။
ငါ့မိန်းမလည်း
မုဆိုးမဘ၀နဲ့ဆယ်နှစ်ကြာမှ
ငါနဲ့ အကြောင်းပါခဲ့တယ်။
ငါ့အမေလည်း မုဆိုးမ
ငါ့ယောက္ခမလည်း မုဆိုးမ
ငါ့သူငယ်ချင်းအမေလည်း မုဆိုးမ
ကြည်အေးလည်း မုဆိုးမ
ကုတ်တနေးလဗ်လည်း မုဆိုးမ
ယိုကိုအိုနီလည်း မုဆိုးမ
ကမ္ဘာကျော်မုဆိုးမ
ပန်းပွင့်လှလှတွေ ပန်လို့
လောကဓံကို အန်တုဆဲ
လွန်ခဲ့တဲ့ နှစ် ၃၀ကျော်က
ငါ့အဒေါ် မုဆိုးမ
ယောက်ျားဆုံးလို့မှ ၆လမပြည့်သေး
နောက်အိမ်ထောင်ပြုလိုက်ရတယ်
ကလေးတွေ တစ်ပြုံတစ်မနဲ့
လိုင်းခန်းက ဆင်းပေးရမှာစိုးလို့။
လှသန်း
Subscribe to:
Post Comments (Atom)
No comments:
Post a Comment