English Vinglish ရုပ်ရှင်ဟာ အိန္ဒိယ ရုပ်ရှင်ကားတွေကို အဆိုအက များလွန်းတယ်ဆိုကာ အကြောင်းပြချက်နဲ့ ဝေးကွာနေလေ့ရှိသူ့ ကျနော့အတွက် အိန္ဒိယရုပ်ရှင်တွေဘက်ကို ပြန်လည်ဦးလှည့်မိစေတဲ့ ဇာတ်ကားတစ်ကားဖြစ်ပါတယ်။
ရုပ်ရှင်ချစ်ပရိတ်သက်တွေကြားမှာ အကြီးအကျယ်ပေါက်ခဲ့တဲ့3 idiots တို့လို့ Every Child is special တို့လို့ ပညာရေးဘက်ကို ဦးတည်ထားတဲ့ ဖြစ်ကားဖြစ်တယ်လို့ ဆိုနိုင်ပေမယ့် တော်တော်လေး ကွဲပြားမှုတွေရှိခဲ့ပါတယ်။ အိန္ဒိယမှာတင်မက တစ်ကမ္ဘာလုံးမှာ အမေ့လျော့ခံနေရသလားလို ယူဆရတဲ့ မိခင်အိမ်ထောင်ရှင်မတို့ရဲ့ ခံစားချက်တွေ၊ တန်းတူညီမျှမှု၊ လူသားတစ်ဦးရဲ့ ကိုယ်ပိုင်ဖြစ်တည်မှုတို့ကိုပါ မီးမောင်းထိုးပြနေခဲ့ပါတယ်။
ရုပ်ရှင်ခေါင်းဆောင်မင်းသမီးကတော့ ဘောလိဝုဒ်ရဲ့ Meryl Streep လို့ တင်စားကြတဲ့ Sridevi ဖြစ်ပါတယ်။ Sridevi ဟာ ရုပ်ရှင်လောကမှာ လျှမ်းလျှမ်းတောက်အောင်မြင်ခဲ့ပေမယ့် မိသားစုဘဝကို ထူထောင်ဖို့ ကိုးဆယ်ခုနှစ်အစောပိုင်းများဆီက အနားယူသွားခဲ့ပြီး ဆယ့်ငါးနှစ်ကြာမှ အခုရုပ်ရှင်နဲ့ပဲ တကျော့ပြန်အောင်ပွဲခံခဲ့တာပါ။ ဇာတ်ကားကို ကိုယ်တိုင်ရေး ကိုယ်တိုင်ဖန်တီးခဲ့တဲ့ အမျိုးသမီးဒါရိုက်တာ Gauri Shinde ကလည်း ရုပ်ရှင်ကားကြီးအနေနဲ့ ဒီကားက ပထမဦးဆုံးပါတဲ့။ အရင်က Documentary film များနဲ့ ကြော်ငြာများမှာ အောင်မြင်ခဲ့တဲ့ ဒါရိုက်တာက ဒီကားကနေ မိခင်ဖြစ်သူကို သူမအနေနဲ့ ဝမ်းနည်းပါတယ်၊ ပြီးတော့ ကျေးဇူးတင်ပါတယ်လို့ ပြောခဲ့တာပါလို့ ဆိုပါရဲ့။
ဇာတ်ကားစတင်ကတည်းက ရှိရင်းစွဲအသက်ထက် အများကြီး နုပျိုလှသွေးကြွယ်နေတဲ့ Sridevi ရဲ့ Sashi ဆာရှီး ဆိုတဲ့ အိမ်ထောင်ရှင်အမျိုးသမီးးဇာတ်ရုပ်နောက် ကျနေ်ာတို့ တကောက်ကော်ပါရပါပြီ။ ဆာရှီးက အချက်အပြုတ်မှာ အင်မတန်တော်၊ အိမ်ထောင်မှု အထိန်းအသိမ်းလည်း အလွန်နိုင်နင်းသလို ခေတ်ပညာတတ် ယောက်ျားရဲ့ ငွေကြေးကို လက်ဖြန့်တောင်းနေရသူတောင်မဟုတ်ပဲ ကိုယ်ပိုင် ရိုးရာမုန့်အချိုလုပ်ငန်းအသေးစားလေး တည်ထောင်ပြီး ဝင်ငွေရှိသူတစ်ဦးပါ။ စာတော်ထက်မြက်တဲ့ သမီးဖြစ်သူရယ်၊ ချစ်စရာကောင်းတဲ့ သားငယ်လေးရယ်ကို ပိုင်ဆိုင်ထားပါရဲ့။ ကဲ ကြည့်ပါဦး။သာမန်မိန်းမတစ်ယောက်အတွက် ဒီထက်ဘာပိုမျှော့်လင့်ချင်သေးတာလဲလို့ ဆိုကြမယ့်သူတွေ ရှိနိုင်ကောင်းပါရဲ့။ ဆာရှီး ယောက်ျားကလည်း ဒီလိုပဲ အောက်မေ့နေခဲ့တာပါ။
ဆာရှီးတစ်ယောက်ရဲ့ မပျော်ရွှင်နိုင်တဲ့ အကြောင်းအရာတွေအားလုံးရဲ့ အရင်းအမြစ်ကတော့ အင်္ဂလိပ်ဘာသာစကား တော်တော်အားနည်းနေရခြင်းပါ။ အင်္ဂလိပ်စကားကို မွှတ်နေအောင်ပြောတဲ့ အဖေဖြစ်သူကိုပဲ သမီးက လေးစားပြီး မိခင်ကိုတော့ အခွင့်သင့်တိုင်း သားအဖနှစ်ယောက်ပေါင်းပြီး နှိမ်ချင် လှောင်ချင်ကြလေ့ရှိကြတာ။ ဆာရှီးက မျက်နှာလေးတငယ်ငယ်။ ကျောင်းမှာ မိဘဆရာတွေ့ဆုံပွဲကိုတောင် သမီးက မဖြစ်သာလွန်းလို့ ခေါ်သွားရပြီး ဆရာနဲ့ စကားပြောရမှာ ကိုယ့်ဘာသာစကားနဲ့ပဲ ပြောခဲ့လို့ အိမ်အပြန်ဆူပွက်သောင်းကျန်းလေရဲ့။
ဒီလိုနဲ့ နယူးယော့ခ်က ဆာချီးရဲ့ တူမဖြစ်သူ မင်္ဂလာဆောင်တော့မယ့် ဆိုသောအခါ ဆာရှီးတစ်ယောက်ပဲ မင်္ဂလာဆောင်ကိစ္စတွေ စီစဉ်ဖို့ လေယာဉ်နဲ့ တစ်ယောက်တည်း အရင်ကြိုထွက်ခဲ့ပါတယ်။ လေယာဉ်ပေါ်ကြုံတဲ့အခက်အခဲတွေကို ဘေးချင်းကပ်ထိုင်ခုံက Amitabh Bachchan က ဝင်ကူညီပေးခဲ့ပါတယ်။ မင်းသားကြီးက တစ်ခန်းနှစ်ခန်းပဲ ပါခဲ့ပေမယ့် အမှတ်ရစရာဇာတ်ဝင်ခန်းတွေပါပဲ။
နယူးယောခ်မြို့ထဲက ကော်ဖီဆိုင်မှာ ဆာရှီးတစ်ယောက် အင်္ဂလိပ်စကားမပြောတတ်လို့ အရှက်တကွဲ ဖြစ်ရတဲ့ အခန်းတွေမှာ ကျနေ်ာတို့တတွေပါ ဆာရှီးနဲ့အတူ လိုက်လို့ ဂယောင်ချောက်ချားဖြစ်ရပါတယ်။ ဆာရှီးရဲ့ သိမ်ငယ်မှု နာကျင်မှု ကြောက်ရွံ့ထိတ်လန့်မှုတို့ကို Sridevi က အကောင်းဆုံး ပုံဖော်သွားခဲ့ပါတယ်။
ဒီလိုနဲ့ လေးပတ်နဲ့ အင်္ဂလိပ်စကားပြောတတ်စေရမယ့်ဆိုတဲ့ သင်တန်းကို ဆာရှီးတစ်ယောက် ငါ တက်မှဖြစ်တော့မယ်လို့ သဘောပေါက်ပြီး ကြိုးစားပန်းစားတက်ရောက်တဲ့အခန်းတွေမှာ ကြည့်နေရင်းက ကိုယ်ပါ အားတက်သရော ဖြစ်လာတော့တာပါ။ အင်္ဂလိပ်စာသင်တန်းမှာ တဖြည်းဖြည်းတိုးတက်လာမှုနဲ့အတူ ယုံကြည်မှုတွေရှိလာတဲ့ ဆာရှီးတစ်ယောက် ဆာရီအပေါ် လောင်းကုတ်အင်္ကျီကြီး ထပ်ဝတ်၊ ကော်ဖီခွက်ကို လက်မှာကိုင်ပြီး ခေါင်းမော့လမ်းလျှောက်တဲ့ အခန်းက ရုပ်ရှင်ရဲ့ ကြည်နူးစရာအကောင်းဆုံးတွေထဲ ပါဝင်ပါတယ်။
ဆာရှီးရဲ့ ကျော့ရှင်းတဲ့ အလှကို စွဲလမ်းမိသူက သူ့လိုပဲ အင်္ဂလိပ်စာလာသင်နေရတဲ့ ပြင်သစ်ပြည်သား Laurent ပါ။ ကလေးနှစ်ယောက်အမေ အိမ်ထောင်ရှင်မ ဆာရှီးက မိတ်ဆွေအဖြစ်ထက် မပိုခဲ့ပေမယ့် သူ့ ဘဝမှာ ကောင်းတာပြောမခံရတာ ကြာလှပြီလို့ ထုတ်ဖော်ခဲ့ပါတယ်။ သူလိုချင်တာ အချစ်မဟုတ်။ လေးစားခံရချင်တာပါပဲတဲ့။ ဆာရှီးရဲ့ အတန်းဖော်တွေကော ဆရာကကော တကယ့်ကို ပြုံးချင်စရာ လူတွေပါပဲ။ ဂေးအမျိုးသားဆရာကို လှောင်ချင်တဲ့ အတန်းဖော်တွေကိုလည်း ဆာရှီးက ခပ်တည်တည်နဲ့ ကွဲပြားခြားနားမှုတွေကြားက လူသားချင်းလေးစားနိုင်မှုကို ရှင်းပြခဲ့ပါရဲ့။
ဒီကြားထဲ အိန္ဒိယက သမီးဖြစ်သူက စာအုပ်ပျောက်လို့ နယူးယော့ခ်က အမေကို ဆူပူအော်ဟစ်ပြီး ဖုန်းဆက်မေးတော့ အမေက စာအုပ်ရှိတဲ့နေရာပြောပြပြီး အမေလည်း မဖတ်ရပါဘူး သမီးရယ်ဆိုတော့ အမေက အင်္ဂလိပ်စာမှ မဖတ်တတ်တာလို့ ငေါက်ငန်းခဲ့ရဲ့။ ဒီမှာ ဝမ်းနည်းနာကျင်သွားတဲ့ ဆာရှီးရဲ့ ရင်ဖွင့်မှုတွေက မိခင်တို့ရဲ့ ဒဏ်ရာတွေကို ကျနော်တို့ကို မြင်သာစေတာပါပဲ။ သားသမီးကို ပညာတတ်အောင်သင်ပေးလို့ ကိုယ့်ထက် ပညာတတ်လာတဲ့အခါ နှိမ်ချဆက်ဆံမှုကို ကြုံလာရတဲ့အခါ ရင်ကွဲရသူက မိခင်ပါ။
သင်တန်း မပြီးသေးခင်မှာပဲ ဆာရှီး တို့ မိသားစုက ဆာရှီးအံ့အားသင့်အောင်ဆိုကာ စောရောက်လာတဲ့အခါ ဆာရှီးတစ်ယောက် သင်တန်းကို ခိုးကြောင်ခိုးဝှက်တက်ရတော့တာ။ ဒီမှာပဲ မိခင်တစ်ယောက်ရဲ့ ကိုယ့်ဖြစ်ချင်တာနဲ့ မိသားစုအပေါ် ဘာကို ဦးစားပေးရမလဲ ရွေးချယ်တဲ့ အခက်အခဲကိုဖြစ်လာပါတယ်။ ဆာရှီးက မိသားစုကိုပဲ ဦးစားပေးခဲ့ပေမယ့် ဆာရှီး တူမငယ်က အဒေါ့်ကို တတ်စေချင်လွန်းလို့ ကူညီပေးခဲ့ပြန်ပါရော။ မိသားစုတွေ စုံလင်နေတုန်း ဆာချီးလုပ်တဲ့ laddoos လို့ခေါ်တဲ့ အိန္ဒိယရိုးရာ အချိုမုန့်ုလုံးတွေ စားလို့ကောင်းလိုက်တာလို့ ဝိုင်းချီးမွမ်းကြတော့ ကျနော့်မိန်းမက laddoos လုပ်ဖို့ လူဖြစ်လာတာလို့ မညှာမတာ အရွှန်းဖောက်ခဲ့ပါသေးရဲ့။ ဆာရှီး တုန့်ပြန်ဖို့တောင် အားအင်မရှိခဲ့ပါဘူး။
အဆုံးသတ်ကတော့ ပျော်ရွှင်ဖွယ်ရာ ဇာတ်သိမ်းလေးပါပဲ။ ဆာရှီးက တူမကြီးနဲ့ သတို့သားကို ချီးမြှင့်ဂုဏ်ပြုစကားကို အင်္ဂလိပ်လိုပဲ ပြောခဲ့ပါတယ်။ ထော့ကျိုးမောင်းနင်းလို့ ပြောနိုင်လည်း ဆာရှီးဆိုလိုချင်တဲ့ အဓိပ္ပာယ်က အရှင်းသားပါ။ (မိသားစုဆိုတာ သာတူညီမျှ ဆက်ဆံတာဖြစ်ရမယ်။ မင်းကို ဘယ်တော့မှ မသိမ်ငယ်စေရဘူး။ မင်းကို လေးစားကြမယ်။ တစ်ဖက်သက်အမြင်နဲ့ စွဲချက်တင်တာမျိုးမဖြစ်ရဘူး။) စတဲ့ အနှစ်နှစ်အလလ မြိုသိပ်ခဲ့ရတဲ့ စကားတွေကြောင့် ခင်ပွန်းနဲ့ သမီးဖြစ်သူလည်း အမြင်မှန်ရခဲ့ပါတယ်။ ဆာရှီးအဖို့က အင်္ဂလိပ်ဘာသာစကားသင်ကြားခြင်းကနေ မိမိကိုယ်ကို ယုံကြည်မှုတည်ဆောက်ဖို့၊ လေးစားချစ်မြတ်နိုးလာဖို့ ရှာဖွေတွေ့ ရှိသွားခြင်းလို့ ဆိုနိုင်ပါတယ်။
ဒီကားမှာ ဆာရှီးအဖြစ် သရုပ်ဆောင်တဲ့ မင်းသမီး Sridevi ဟာ ဇာတ်ကား အစအဆုံး ပရိသက်အာရုံ သူ့ဆီ ကပ်ညိနေအောင် ပညာသည်ပီသခဲ့ပါတယ်။ ရုပ်ရှင်မရိုက်တာ နှစ်နဲ့ချီနေလို့ အမူအရာချို့ ယွင်းတာမျိုးမရှိပဲ အနှစ်နှစ်အလလ အနားယူခဲ့သမျှ ပြန်လည် အကြွေးဆပ်တဲ့ပွဲလို့တောင် ဆိုနိုင်ပါတယ်။ နို့တိမ်သားပေါ်မှာ ကော်ဖီစက်ကြီး နှစ်စက် ပြုတ်ကျထားတာနဲ့တူတယ်လို့ အညွန်းခံရတဲ့ မျက်လုံးဝိုင်းစက်စက်တွေကနေတဆင့် ကျနော်တို့တွေ နာကျင်ရ၊ သိမ်ငယ်ထိတ်လန့်ရ၊ ကြွေကွဲနာကျည်းရ၊ ပျော်ရွှင်ကျေနပ်ရ။ တကယ့်ကို ရသအမျိုးမျိုးပေးနိုင်တဲ့ မျက်ဝန်းတွေပါပဲ။ ကျက်သရေရှိလှတဲ့ အလှကို ပိုင်ဆိုင်ထားတဲ့ မင်းသမီးဟာ ဒါရိုက်တာရဲ့ မိခင်ကို အာရုံညွှတ်နူးထားတဲ့ ဇာတ်လမ်းကို အကောင်းဆုံး တင်ဆက်သွားနိုင်ခဲ့ပါတယ်။
ဒီကားက အိန္ဒိယက မိခင်တွေရဲ့ဘဝသာမက တိုင်းပြည်အသီးသီးက နောက်တန်းပို့ခံထားရတဲ့ မိခင်တွေ့ ရဲ့ ဘဝအပေါ် တနည်းနည်းတော့ ရိုက်ခတ်မှု ရှိလာမယ်လို့ မျှော်လင့်နိုင်ပါတယ်။
အိမ်ထောင်ဦးစီးဖခင်ကလည်း အလုပ်လုပ်နေရတာကြောင့် လိုအပ်တဲ့ ပညာဆက်လက်ဆည်းပူးမှုရှိနေနိုင်ပြီး မိခင်ဘဝကတော့ နောက်တန်းမှာပဲ သားသမီးနှင့် ခင်ပွန်းသည်တို့ ဝေယျာဝစ္စ အပေါင်းနဲ့ပဲ ပညာသင်ယူမှုရပ်တန့်သွားတာများပြီး ကုန်လွန်သွားရတာ များလှတာပါ။။ မိသားစုက စုပ်ယူလိုက်လို့ ကိုယ်ပိုင်ဖြစ်တည်မှု အိပ်မက် တစစ ပျောက်ဆုံးသွားခဲ့တဲ့ မိခင်တွေရဲ့ဘဝကို မြှင့်တင်ပြောင်းလဲပေးဖို့ ၊ မေမေတို့ရဲ့ အိပ်မက်တွေကို ကူညီပုံဖော်ပေးဖို့ တာဝန်တွေရှိလာပြီလို့ ခံစားလာရမယ့် ရုပ်ရှင်လည်း ဖြစ်ပါတယ်။
အိန္ဒ္ဒိယလို ရုပ်ရှင်တွေမှာ ကြုံတိုင်း အင်္ဂလိပ်စကား ညှပ်ပြောတဲ့ တိုင်းပြည်မှာတောင် လူဦးရေ ရှစ်ဆယ်ရာခိုင်နှုန်းက အင်္ဂလိပ်စကားကို ကျွမ်းကျွမ်းကျင်ကျင် မပြောနိုင်ပါဘူးတဲ့။ ဒီတော့ မဖြစ်မနေ ပြောရမယ့် အခွင့်အခါ ကြုံလာရရင် လူကြားထဲမှာ ကသိကအောက်ဖြစ်ရတာပါ။ ဒီ Engish Vinglish ရုပ်ရှင်ကားက လူအများကြီးနဲ့ ဆက်နွယ်နေတဲ့ အကြောင်းအရာကို ရှေ့ထုတ်ပြဖို့ ကြိုးစားပြထားတာ ဖြစ်ပါတယ်။
ကျနော်တို့တတွေကလည်း ဆာရှီးတစ်ယောက် အင်္ဂလိပ်စကားမကျွမ်းကျင်လို့ ခံစားရသမျှ စိတ်ဒုက္ခတွေကို ထပ်တူထပ်မျှ လိုက်ပါခံစားနိုင်တဲ့ အနေအထားမှာပါပဲ။ (အိမ်မှာ မေမေနဲ့ အင်္ဂလိပ်စာ လိုက်ကျက်ဦးမှ)
ဇွဲလွင်
No comments:
Post a Comment