Tuesday, May 28, 2013
ငြိမ်းချမ်းရေ ငြိမ်းချမ်းရေးကိုရေးတဲ့ကဗျာ ငြိမ်းချမ်းပါစေသား
စားပွဲပေါ်မှာ ရွှေပန်းကန် ငွေပန်းကန် ကြေးပန်းကန် ကြွေပန်းကန်တွေ။
ပန်းကန်တွေထဲမှာ
ကြက်ပေါင်တွေလို သေနတ်တွေ ၀က်အူချောင်းတွေလို ကျည်ဆံတွေ
ခုမှ စစ်ပွဲကထလာစ အငွေ့တလူလူ သွေးနံ့ယမ်းနံ့တွေနဲ့ စွတ်စိုယိမ်းယိုင်လို့။
Ambulance ကားတွေ အော်မြည်ပြေးဝင်လာသလို
ကားတွေ တစ်စီးပြီးတစ်စီး ထိုးဆိုက်လာတယ်။
တောတောင်တွေနဲ့တောပန်းတွေ တုတ်တုတ်မျှမလှုပ်ရဲ။
အပြေးအလွှားနဲ့ ရေကြီးသုတ်ပြာ
တစ်ယောက်နဲ့တစ်ယောက် ဖက်လှည်းတကင်း ပွေ့ဖက်ကာ
တစ်ယောက်နောက်ကျောကမြေပုံကို တစ်ယောက်ခိုးကြည့်ကြ။
ပြီးတော့ အနောက်ကိုအသာပြန်ဆုတ်
တစ်ယောက်ကိုတစ်ယောက် လက်ထိပ်ခတ်သလို လက်ဆွဲနှုတ်ဆက်လိုက်ကြတယ်။
နယ်မြေဒေသလေ့လာသလို သက်သေအထောက်အထားများယူသလို
သတင်းထောက်တွေနဲ့ ဓါတ်ပုံသမားတွေ ပြေးလွှား
ပျားပန်းခပ် ရသမျှအရုပ်တွေ ကမ္ဘာထဲမောင်းထည့်ဖို့။
ပြီးမှ ပျော်ပျော်နဲ့ပါးပါး
ရှန်ပိန်နဲ့စိမ်ထားတဲ့ချိုးသားကို ၀ိုင်အရက်နဲ့မြည်းကာ
ရုပ်သေးရုပ်များလို တန်းစီကနေကြတာကို ငါတို့အားလုံး ဂြိုဟ်တုကတွေ့ခဲ့ကြ။ ။
ခရမ်းပြာထက်လူ
( ၂ ၀ ၁ ၃ )
Subscribe to:
Post Comments (Atom)
No comments:
Post a Comment